呢排唔止Blog，facebook，仲連電視都講行山。老實講雖然自己都好鐘意行山，但呢個時勢走上山，又迫過旺角，盞搞到病毒週圍都係，所以都好耐無行過山了。 呢排自己一路開YouTube睇行山片一邊寫稿時，都諗緊就算個人離開唔到香港、甚至係屋企都好，上網睇吓片或者睇返舊相緬懷返之前嘅旅程，都係一件開心嘅事。睇吓睇吓就索性分享埋比大家睇啦！
第一個係比較近期同比較簡單嘅地點 - 鶴咀。嚴格講呢個甚至唔應該叫做郊遊地點，因為呢個地方係香港少數嘅海岸保護區，唔鼓勵大家湧入去遊玩，所以𠴱度係連正常嘅廁所都無咖！呢樣大家一定要留意。雖然係咁，呢度依然極受歡迎，因為真係好靚同埋好易去。
之所以話易去，因為只需要去筲箕灣坐一程巴士或者小巴就去到了。去到之後再行一大段路，雖然唔係山徑泥路，仲要小心往來嘅車輛（去𠴱日好多重型車經過），不過就可以遠眺赤柱，都幾舒服嘅。行吓行吓，就去到鶴咀村，有少少新界東北，即係鹿頸或者沙頭角一帶嘅感覺，喺香港島都有呢d隱世村落，感覺都幾奇妙。再行多大約十分鐘，就去到無線電站，要繞道而行。行嗰日都算多人，所以基本上無咩寧靜嘅感覺，即使係咁，去到鶴咀嘅時候，依然覺得好震憾！
海浪不斷咁拍上岸，海浪聲不絕於耳，有幾個海蝕洞可以走近少少窺探同感受海浪聲，係一個好舒服嘅環境。可惜之前嘅遊人唔識得珍惜，望海嘅珍貴鯨骨受到破壞；港大嘅海洋研究院被迫將研究搬到對岸做，以免受干擾；仲有遊人走落海灘執石頭。唉，你可能覺得成個石灘少塊石無咩問題，但對以海灘為家嘅生物來講，咁樣同拆佢地屋企有咩分別呢，真心希望去遊玩嘅人可以嘗試一下
"Leave nothing but footprints, take nothing but pictures, kill nothing but time"
一齊愛護呢一個嘅靚咁珍貴嘅福地啦！
之後再行咗去睇香港第一個燈塔，好多人羨慕外國有好靚嘅燈塔，其實香港一樣有，可惜嗰日天氣差咗少少，算係一種遺憾。
最後一定要分享吓回程喺鶴咀村食嘅下午茶，雖然寫住有洗手間，大家千祈唔好有咩期望，係一個核突到嚇死人嘅旱廁。但洗手過後喺士多食嘅餐蛋麵同水餃就真心高質了！估唔到會係即包即煮，嗰種鮮嫩真係令人重新定義水餃，仲有脆皮餐肉加微微焦咗邊嘅煎蛋，合體成一碗非常美味嘅餐蛋麵。通常呢d郊遊點嘅食物都無咩好期望，但呢個真心驚喜。
今次分享就到呢度，對海洋有興趣，鐘意看海嘅朋友，呢個地方，值得去！
Comments