呢排基本上除咗返工之外，就只有宅在家望天打卦，食外賣食到悶死，都多咗機會自己煮嘢食。今日上討論區，見到有人為意粉應否落cream爭論到面紅耳熱，就突然想食意粉類嘅嘢。
老實講我係屬於食Pizza加菠蘿都唔覺有問題嘅人，所以對我來講有無cream都咁鍾意。不過比起意粉，個人鍾意螺絲粉多D（其實咁啱屋企有就唔使買）。一於就挑戰吓啦！ 又由於我懶睇火，用電飯煲整就乾手淨腳。真係要多謝我朋友送嘅多功能飯煲，整咩都咁就手！ 一人份嘅材料： （隨意啦，以下只是大概份量）
1. 螺絲粉80g (我無磅過）
2. 吞拿魚一小罐 （其實呢罐本來係打算搽麵包用嘅，加上我怕肥，其實煮嘢食用油浸吞拿魚較好味）
3. 蒜頭半個（蒜怪請隨便加）
4. 白酒半杯(有人會用水或雞湯,up to you）
5. 油、鹽、黑椒、香料少量 做法： 1. 熱咗個飯煲，落油同蒜頭爆香 2. 同一時間煮螺絲粉（大約8分鐘，就算仲硬都唔緊要，因為一陣仲要煮） 3. 吞拿魚隔水（用油浸吞拿魚嘅就隔油啦） 4. 吞拿魚同蒜頭一齊爆吓佢，乾身就可以 5. 落白酒（可以辟咗吞拿魚嘅腥），滾佢地一陣 6. D水收到差唔多，可以落螺絲粉兜吓佢，隨喜好加鹽、黑椒、香料 7. Done！落少少 Basil/Parsley上碟會靚D
Comentários